Dyipney
Ilang mahabang panahon din ang lumipas,
kung saan ang pait ay yumapos na sa limot.
Hanggang sa tayo’y humakbang sa hiwaga ng pagkikita.
Sa loob ng hari ng lansangan
na may apat na kumakaripas na gulong
Muling nasilayan ka!
Ilang ulit akong sumulyap
na waring ang mga alaala ay kinakapang muli
ngunit sila ay tila natapakan na ng galit.
Lumalawak ang mapangaraping diwa.
Bitbit ang pira-pirasong basag na nakaraan.
Pilit isinasaayos sa wasto nitong anyo
subalit sugat lamang ang natamo.
Sugat na pagkalinga lamang
ang tanging makakapaghilom
Sa loob ng dyipney,
na may mga kumakaripas na gulong at
sumasabay sa mabilis na pagkaripas ng mga ala-ala.
Sa dyipney,
sana’y muling makasabay ka!
Sa dyipney,
sariwain natin ang mga ala-ala.
***tulang isinulat noong 2009, araw kung kailan hindi inaasahang magtagpo ang aming landas pagkalipas ng apat na taon.